နိစ္စဒါနပရဟိတအသင်း၏ ကာလဒါနကုသိုလ်ပြုပွဲပြီးစီးမှု....
မြန်မာပြည်၌လက်ရှိပြည်သူများ တွေ့ကြုံခံစားနေရသော ရေဘေးဒုက္ခကို မြန်မာပြည်သားများဖြစ်ကြပါသော မလေးရှားရောက်မြန်မာလူငယ်များ လူမှုကူညီရေးအဖွဲ့ နိစ္စ-ဒါနပရဟိအသင်း(ကွမ်တန်းမြို့)မှလဲ တစ်ထောင့်တစ်နေရာမှ မိမိတို့စွမ်းနိုင်သလောက် ပါဝင်ကူညီခဲ့ရာတွင် ရေဘေးကြောင့် စားရေးသောက်ရေးအတွက် အခက်တွေ့နေရှာသော ပခုက္ကူမြို့နယ် ဘောလုံးခုန်ကျေးရွာသို့ မနေ့ကအဖွဲ့ဝင်များသွားရောက်၍ ရွာလုံးကျွတ် အိမ်ထောင်စုဦးရေ ၁၇၀ ခန့်ကို ဆန်၊ဆီ၊ဆား၊ဆေးဝါးများနှင့် ခေါက်ဆွဲခြောက်ထုပ် ၊ ရေသန့်ဗူးတို့ကို အိမ်ထောင်စုတစ်စုလျှင် ခွဲတမ်းကျနှုန်းဖြင့် ထောက်ပံ့ဝေငှ၍ ကုသိုလ်ပြုခဲ့ကြပါသည်။
ထိုရွာရှိ ဘုန်းကြီးကျောင်းတွင် ဆွမ်းကပ်ခြင်း ၊ ဆရာတော်အား နဝကမ္မဝတ္ထုငွေကပ်လှူခြင်း စသော ကုသိုလ်များကိုလည်း ပြုခဲ့ကြပါသည်။ ထိုမှ ပိုသော လက်ကျန်ငွေအနည်းငယ်ကိုလဲ အသင်းမှမတည်ကာ အနီးအနားမှ စေတနာရှင်များ၏သဒ္ဓါစွမ်းအားဖြင့် တစ်နပ်စာအာဟာရထမင်းထုပ်များ ချက်ပြုတ်လှူဒါန်းပေးမည်ဟု သွားရောက်ကူညီသူ အသင်းသားများထံမှ သတင်းပို့ထားပါသည်။ ကာလဒါနဖြစ်၍ ခက်ခဲသောကုသိုလ်မျိုးဖြစ်ပေရာ လှူဒါန်းရသူ ကုသိုလ်ရှင်အလှူရှင်တို့မှာ လွန်စွာကြီးမားသော အကျိုးကိုရရှိကြမှာ မလွဲပါ။
ဤကုသိုလ်အစုစုသည် မိမိတို့ရောက်ရှိနေထိုင် လုပ်ကိုင်ရာ ကွမ်တန်းမြို့ရှိ အလှူငွေများထည့်ဝင်လှူဒါန်းပေးကြပါသော စေတနာရှင် အလှူရှင်များနှင့် နိစ္စဒါနပရဟိတအသင်းသူ အသင်းသား ညီကိုမောင်နှမများတို့၏ စုပေါင်းကုသိုလ်ဖြစ်ပါသည်။ ထို့ကြောင့် ဝမ်းမြောက်နုမော် သာဓုခေါ်ကြပါကုန်။
လုပ်အားဒါန ကာယအား ဉာဏအား ဝီရိယစွမ်းအားဖြင့် အပင်ပန်းခံကာ အသင်းမှတာဝန်ကို ကျေပွန်သည်မက ကောင်းမွန်အောင် မအားလပ်သည့်ကြားမှ သဒ္ဓါစွမ်းအားဖြင့် ကူညီထမ်းဆောင်ကြပါသော နိစ္စဒါနပရဟိတအသင်းမှ ကိုဟန်ဝင်းနှင့်ကိုကျော်သူတို့ကိုလဲ ကွမ်းတန်းမှညီကိုများကိုယ်စား အသင်းမှအထူးကျေးဇူးတင်ဂုဏ်ပြုအပ်ပါသည်။
မိမိတို့စီမံလိုသော ဆန္ဒအတိုင်းဖြစ်မြောက်အောင် အဖက်ဖက်မှလိုအပ်သော ကား ၊ စက်လှေများဖြင့် ကုသိုလ်ပြုစီစဉ်ပေးကြပါသော ကူညီရေးအဖွဲ့မှဥက္ကဌနှင့်အဖွဲ့သားများ ၊ ၎င်းရွာရှိရပ်မိရပ်ဖများ စသည်အားလုံးတို့အား ကျွန်တော်များနိစ္စဒါနပရဟိတအသင်းမှ အထူးကျေးဇူးတင်ပါကြောင်းနှင့် စုပေါင်းပြုရ ဤကုသလသည် သံသရာရေလျင်ကြောမှာ မျော၍နေရပါသော မိမိတို့အား ထိုသံသရာရေလျင်ကြောမှ ဆန်တက်၍ ဝဋ်ကျွတ် ကံပြတ် သံသရာစခန်းရပ်နိုင်သော အရဟတ္တမဂ်ဉာဏ် အရဟတ္တဖိုလ်ဉာဏ်ကို ရရာ ရကြောင်း အထောက်အပံ့ကောင်း ဖြစ်ပါစေသတည်း။
အားလုံး ဝမ်းမြောက်နုမော်သာဓုခေါ်ကြပါကုန်..။
နိစ္စ-ဒါနပရဟိတအသင်း (ကွမ်တန်းမြို့)
